3. तृतीयः परमवीरः राम रघोबा राणे

 

३. राम रघोबा राणे

 

एषः परमवीरः १९१८ तमे इसवीये वर्षे कर्नाटकराज्यस्य  हावेरी इत्यत्र  जन्म प्राप्तवान् । एतस्य पिता Police Constable  आसीत् । भारतीयसैन्यस्य  Mumbai Engineer Unit  इत्यत्र  १०/०७/१९४० तमे वर्षे नियुक्तः अभवत् ।

द्वितीयविश्वयुद्धावसरे  बर्माप्रदेशे  जापानदेशस्य सैन्यं विरुध्य एषः युद्धं कृतवान् आसीत् ।

१९४८ तमे वर्षे पाकिस्थानीयेभ्यः काश्मीरं उन्मोचयितुं/वशीकर्तुं  प्रवृत्ते युद्धे एषः महत्वपूर्णां भूमिकां निरवहत् ।  पाकिस्थानीयाः शत्रवः  काश्मीरस्य नौशेरा-रजौरी-राजमार्गं सम्पूर्णं ध्वंसीकृतवन्तः आसन् । तदा भारतीयसैन्येन  अग्रेसरणाय  अपरः मार्गः आश्रयणीयः अभवत् ।

युद्धार्थं Tanker इत्याख्याः शतघ्न्यः उपयोक्तव्याः आसन् ।  तेषां गमनाय  विद्यमाने मार्गे सर्वत्र  शत्रवः  विस्फोटकानां  निखननं कृत्वा  स्थापितवन्तः आसन् ।  अतः तानि उत्पाट्य  नाशयित्वा  एव अग्रे गन्तव्यमासीत् । किन्तु उत्पाटनाय  अस्मदीयाः  प्रवर्तन्ते चेत्  पर्वताग्रे  उपविष्टः शत्रुः अस्मदीयान् अनायासेन भुषुण्डिकया प्रहर्तुमर्हति स्म । अतः तानि विस्फोटकानि कथं वा निष्कासनीयानि इति चिन्ता अस्माकं सैन्यस्य आसीत् । तदा राणे एकम् उपायम् उक्तवान्  - “शतघ्नीनां अधस्तात् अल्पे एव स्थले अजगरवत् सर्पन् भूमौ शत्रुभिः निखनितानि विस्फोटकानि नाशयिष्यामि । शतघ्न्याः अधस्तात् एतत् कार्यं सम्पाद्यते इत्यतः शत्रुः लक्ष्यं भेत्तुं न शक्ष्यति ” इति ।  किन्तु एतत् कार्यं  अत्यन्तं दुष्करम् आसीत् ।  ईषदपि अनवधानं भवति चेत् अस्माकमेव शतघ्नीनां अधस्तात्  अस्माकं वीरयोद्धा  चूर्णीभवति । किन्तु अन्यः उपायः नासीत् ।  रामरघोबा राणेवर्यस्य  दलं एतत् कार्यं साधयितुं  सन्नद्धम् अभवत् । विस्फोटकानाम् अभिज्ञानमपि  अत्यन्तं कठिनं कार्यम् आसीत् ।  तानि अनभिज्ञाय  अग्रे प्रवर्तन्ते चेत्  तेषामेव विस्फोटनेन सर्वे म्रियेरन्  इति स्थितिः आसीत् । एवं कार्यं कर्तुं  आरब्धवत्सु  रामरघोबा राणेवर्यस्य  त्रयः सहकर्मिणः मृताः अभवन् । स्वयं राणेवर्यः  अपि शत्रूणां गोलिकावर्षणेन प्रहृतः अभवत् ।  तथापि  सः धैर्येण अहर्निशं  दिनत्रयं आहारनिद्रादिकं परित्यज्य शत्रूणां समीपं अस्माकं शतघ्नीनां गमनाय मार्गं प्रशस्तं कृतवान् ।

एषः एतस्मात् युद्धात्  अनन्तरमपि  २० वर्षाणि सैन्ये सेवां कृत्वा  १९६८ तमे वर्षे  निवृत्तः अभवत् ।  १९९६ तमे वर्षे पुणॆ नगरे सः इहलोकं  पर्यत्यजत् । स्वतन्त्रभारते सजीवः सन्तः परमवीरचक्रं प्राप्तवत्सु एषः आदिमः ।